Gipalapdan sa Department of Labor and Employment (DOLE) Bukidnon ang ilang mga programa sa tabang-trabaho ug panginabuhian taliwala sa epekto sa El Niño ug taas nga gasto sa inadlaw-adlaw nga paliton.
Sa pakighinabi kang Ruben T. Biado, Supervising Labor and Employment Officer sa DOLE Bukidnon, gipahibalo niini nga ipatuman na ang ikaduhang tranche sa Wage Order No. 24 sugod karong Mayo 1. Ubos niini, mosaka na ngadto sa ₱500 ang minimum wage alang sa Category 1 ug ₱485 alang sa Category 2 sa Northern Mindanao.
Gawas sa umento sa suholan, gipakusgan usab ang TUPAD program alang sa mga trabahanteng nawagtangan og panginabuhian. Gilunsad usab ang programang “Tuloy ang Pasada” diin target ang 300 ka mga drayber sa NOBOTSCO (Malaybalay-Impasugong route) nga makadawat og 15 ka adlaw nga sweldo base sa minimum wage rate.
Bahin usab sa isyu sa contractualization o “Endo,” gipahimangnoan ni Biado ang mga establisemento nga sundon ang balaod sa regularization para sa mga empleyadong miabot na og unom ka bulan sa serbisyo o naghupot og mga essential nga posisyon.
Nanawagan ang DOLE sa mga trabahante nga pahimuslan ang mga ayuda ug livelihood grants sa gobyerno aron makatabang sa pagpagaan sa kalisod nga giatubang sa matag pamilya karong panahona.