Nagpabiling luwas ang mga lokal ug langyawng turista sa tibuok Region 10 sukad niadtong Abril 1 hangtod karon.
Sa pakighinabi sa Bombo Radyo Malaybalay kang PMaj. Joann G. Navarro, tigpamaba sa Bukidnon Police Provincial Office (BPPO), gipahayag niini nga wala’y natala nga bisan unsang krimen batok sa mga bisita tungod sa gipakusgan nga seguridad ilalom sa “Ligtas Sumvac 2026.”
Sumala ni Navarro, gipakatap ang mga personahe sa kapulisan sa tanang mga tourist destinations aron masiguro ang kaluwasan niining panahon sa ting-init. Namatikdan usab ang pagkunhod sa kinatibuk-ang kaso sa krimen sa rehiyon tungod sa hugot nga koordinasyon sa PNP ngadto sa AFP, PCG, ug uban pang ahensya ubos sa Safer Cities initiative sa DILG.
Dugang pa niini, gipasigarbo usab sa opisyal ang malampusong kampanya batok sa ilegal nga droga diin minilyon ka kantidad sa shabu ang nasakmit bag-ohay lang sa Tagoloan, Misamis Oriental, lakip na ang pagpang-ronda sa mga ilegal nga armas o loose firearms.
Nanawagan ang kapulisan sa publiko nga magpabiling mabinantayon ug daling i-report ang bisan unsang kadudahang kalihokan aron mapadayon ang kalinaw ug kahusay sa tibuok amihanang Mindanao.