Misaka na sa 15 ka tawo ang nakabsan sa kinabuhi sa nahitabong panagbangga sa tren duol sa Jakarta, Indonesia, diin halos tanan niini mga kababaihan sumala sa mga awtoridad.
Nahitabo ang maong trahedya niadtong milabayng adlaw sa Bekasi Timur Station sa dihang mibangga ang usa ka long-distance train sa luyong bahin sa naghunong nga commuter train.
Ang naigo nga bagon gigahin matud pa alang sa mga babaye nga pasahero aron mahatagan sila og luwas nga dapit batok sa harassment.
Miabot sa 88 ang nangaangol nga daling gidala sa nagkalain-laing ospital, samtang ang mga namatay gipailawom pa sa proseso sa pag-ila sa ilang mga kabanay.
Sumala sa state-owned railway operator nga PT Kereta Api Indonesia, luwas matud pa ang 240 ka pasahero sa long-distance train nga nalambigit sa aksidente.
Sa pagkakaron, padayon pa ang imbestigasyon sa mga awtoridad, lakip na ang Indonesian police ug ang National Transportation Safety Committee, aron masuta ang eksaktong hinungdan sa bangga.