Gipagawas na sa Malacañang ang pormal nga kamanduan nga nagsuspenso sa excise tax sa liquefied petroleum gas (LPG) ug kerosene isip tubag sa taas nga presyo sa lana sa global nga merkado.
Sa Executive Order No. 114 nga gipirmahan ni Pangulong Ferdinand Marcos Jr., nakalatid niini nga tulo ka bulan nga walay ipatuman nga excise tax sa LPG ug kerosene, subay sa rekomendasyon sa Development Budget Coordination Committee (DBCC).
Lakip sa suspensyon ang LPG nga gigamit sa petrochemical production ug transport fuel, lakip na usab ang kerosene nga gigamit isip aviation fuel.
Matag bulan usab ipahigayon ang pag bag-o sa polisiya ug mamahimong mas palapdan,bag-uhon o ipahunong depende sa rekomendasyon sa DBCC.
Awtomatiko usab nga ibalik ang excise tax kung mukunhod na ang presyo sa lana sa gitakdang lebel o kung mapupus na ang tulo ka bulang suspensyon.
Gimanduan usab ang Department of Energy (DOE), Department of Finance (DOF), Bureau of Internal Revenue (BIR), ug Bureau of Customs (BOC) nga siguroon nga hapsay ang pagpatuman sa EO ug gikinahanglan nga adunay igong suplay sa mga apektadong produktong petrolyo.