Sugdan na karong semanaha sa Department of Agriculture (DA) ang pag-apod-apod sa ₱10-bilyon nga Presidential Assistance for Farmers and Fisherfolk Program (PAFFP) aron makahatag og dinaliang pinansyal nga tabang sa kapin upat ka milyon ka gagmayng prodyuser sa nasud nga naapektuhan sa presyo sa lana.
Base sa anunsyo sa ahensya, makadawat og tig-₱2,325 nga cash assistance ang kapin 4.17 milyong benepisyaryo.
Ang pondo naggikan sa 2026 General Appropriations Act (GAA) o Republic Act No. 12314.
Ihatag ang unang tranche sa pinansyal nga tabang sa mga kwalipikadong benepisyaryo gikan sa Regions I, II, III, VI, ug IX.
Lakip sa mga target nga makadawat niini mao ang mga mag-uuma sa humay nga adunay uma nga duha ka ektarya paubos, mga mag-uuma sa mais ug tubo, ingon man ang mga mangingisda nga nagsalig sa motorized boats.
Gipaabot sa ahensya nga ang makadawat lamang sa maong ayuda mao ang mga rehistrado sa Registry System for Basic Sectors in Agriculture ug National Program for Municipal Fishing Vessels and Gears Registration.
Sumala kang Agriculture Secretary Francisco Tiu Laurel Jr., dako nga tabang ang ayuda ilabi na sa panahon nga lisod ang kita sa sektor tungod sa taas nga presyo sa petrolyo nga nakaapekto sa gasto sa irrigation pumps, farm machinery, ug mga bangka.