Gipadayag ni kanhi Ilocos Sur Governor Luis “Chavit” Singson ang lig-on nga tinguha niini sa pagbalik sa Senado aron mohatag og dugang katin-awan may kalabotan sa imbestigasyon sa giingong anomaliya sa mga flood control projects sa nasud.
Giklaro sa kanhi gobernador nga andam na ang notaryadong affidavit nga nagsaysay sa mga nahibaloan bahin sa maong isyu, lakip na ang mga koneksyon nga buot niining ipaabot ngadto sa buhatan sa Presidente.
Gipasabot usab ni Singson ang nahitabong pagkalangan sa paghatag og testimonya niadtong milabayng semana.
Sumala niini, anaa na unta kini sa Senado niadtong petsa 7 sa Abril, apan nakadawat og pahibalo nga ang pagdungog sa Blue Ribbon Committee dili madayon.
Kini tungod kay gikinahanglan pa ang pirma sa ubang mga senador alang sa partial committee report sa dili pa hingpit nga madawat ang pormal nga pamahayag niini
Gipaniguro ni Singson nga wala kini tuyo nga likayan ang maong imbestigasyon.
Gipasiugda niini nga ang iyang kooperasyon nagpakita lamang sa iyang suporta sa tinguha sa kagamhanan nga malimpyohan ang mga proyekto sa gobyerno batok sa korapsyon.
Nagpaabot na lamang kini sa pormal nga tawag gikan sa komite aron hingpit nga masumite ang affidavit ug makatubag sa mga pangutana sa mga magbabalaod.