Nagbilin og kapin ₱5.8 milyones nga danyos ang natala nga 42 ka mga insidente sa sunog sa tibuok probinsya sa Bukidnon sulod lang sa bulan sa Marso.
Sa pakighinabi sa Bombo Radyo Malaybalay, gibutyag ni SFO1 Marvin G. Talibong, OIC, Intilegence and Investigation Section sa Bureau of Fire Protection (BFP) Bukidnon, nga kadaghanan sa maong mga sunog naggikan sa mga panimalay o residential fires. Sa maong ihap, ang Valencia City mitala og walo (8) ka kaso, samtang tag-lima (5) usab ang sa Malaybalay City ug Maramag.
Sumala sa BFP, ang nag-unang hinungdan sa kalayo mao ang overloading sa electrical appliances, mga bata nga nagdula og posporo, ug mga nabiyaan nga giluto. Sa kinatibuk-an, mikabat sa ₱5,846,925 ang kantidad sa mga kabtangan nga naugdaw sa maong bulan.
Tungod niini, nagpahimangno ang mga otoridad sa publiko nga magmabinantayon pinaagi sa pag-unplug sa mga de-kuryenteng kagamitan ug pagsiguro nga mapalong ang kusina sa dili pa mobiya sa balay. Gidasig usab ang matag pamilya nga ibutang sa daling makit-an nga dapit ang numero sa ilang lokal nga estasyon sa bombero alang sa daling pagresponde sa mga emerhensya.