Gipasalig sa Department of Social Welfare and Development (DSWD) nga aduna pa’y igong kapasidad ang ahensya sa paghatag og ayuda sulod sa mosunod nga tulo ka buwan taliwala sa nasinati nga krisis sa enerhiya.
Matud pa ni DSWD Usec. Aliah Dimaporo, kasamtangan nga nagpatuman og mga “stop-gap measure” aron daling makatubag sa krisis, ilabi na sa epekto sa nagsaka nga presyo sa lana.
Samtang giangkon sa ahensya nga ang kasamtangang ayuda alang lamang sa mubo nga panahon.
Nagpagawas usab og pahimangno ang opisyal nga kon molungtad ang krisis og unom ka buwan ngadto sa usa ka tuig, posibleng mameligro ang pagpadayon o sustainability sa ilang mga programa.
Gikabalak-an usab ni Dimaporo nga kon magdugay ang maong sitwasyon, posibleng magsalig na lang ang katawhan sa mga temporaryong ayuda.
Sa pagkakaron, gigamit sa DSWD ang ilang AICS Aid to Individuals in Crisis Situation funds ( AICS ) aron matubag ang panginahanglanon sa katawhan, apan giangkon nila nga kinahanglan kini og mas taas nga plano kon dili pa masulbad ang krisis sa enerhiya sa nasod.