Gibatikos ni House Committee on Justice Vice Chair ug San Juan Rep. Ysabel Maria Zamora, ang pahayag ni Zamboanga City Mayor Khymer Olaso nga nagtawag og “kalokohan” o binuang ang impeachment process sa Kamarabaha.
Sa usa ka Facebook video, mapintas ang pinulongan nga gigamit ni Olaso batok sa mga mambabalaod, hinungdan nga gitubag kini ni Zamora.
Sumala ni Zamora, dili angay gamiton ang mga pulong sama sa “kalokohan” ug “bugok lang ang nagbuhat” sa usa ka maayong diskurso.
Gipasabot ni Zamora nga ang impeachment dili lang usa ka politikanhong kapilian kondili usa ka obligasyon nga gitakda sa Konstitusyon nga kinahanglan buhaton sa Kamarabaha kung adunay mapasakang reklamo.
Matud pa niini, mahimong pasagdan sa mga opisyal ang ilang katungdanan kung dili nila sundon ang mando sa Saligang Batas.
Gipanghimakak usab sa representante sa San Juan ang akusasyon ni Olaso nga wala nagabuhat sa ilang trabaho ang mga mambabalaod gumikan naka-focus sila sa impeachment.
Sumala ni Zamora, padayon ang Kongreso sa pagpasa og mga balaod nga makatabang sa kinabuhi sa mga Pilipino samtang nagpadayon ang mga pagdungog.
Sa karon, ginatan-aw sa House Justice panel ang “probable cause” sa mga reklamo batok kang Vice President Sara Duterte human kini ideklarang igo sa porma, substansya, ug basehan.
Gitugotan usab sa plenaryo ang komite nga ipadayon ang mga hearing bisan sa panahon sa recess sa Kongreso gikan Marso 21 hangtod Mayo 3.
Matud ni Zamora, nga dili patas ang pag-ingon nga ang tanan wala nagabuhat sa ilang trabaho gumikan bahin usab kini sa trabaho isip mga kongresista.
Dugang pa ni Zamora, nga angay masayod si Mayor Olaso niini gumikan kaniadto kongresista man usab kini.
Gipunting usab niini, nga ang paghimo og balaod mao ang nag-unang trabaho sa mga kongresista, ug kung tan-awon sa publiko, ginabuhat kini.