Nagpasidaan ang Presidential Communications Office (PCO) batok sa halapad nga pagkatap sa sayop o bakak nga impormasyon nga giabusaran ang kasamtangang sitwasyon sa enerhiya sa nasud.
Sumala ni PCO Secretary Dave Gomez, nga manubag ubos sa balaod ang bisan kinsa nga tinuyoang maghimo ug magpakatap og peke nga balita online.
Gipahinumdum ni Secretary Gomez nga ang pagpakatap og “fake news” adunay silot nga moabot og unom ka bulan nga pagkabilanggo sumala sa Revised Penal Code.
Kung buhaton kini online, doble ang silot ubos sa Cybercrime Prevention Act.
Dugang pa niini, ang disinformation nagaguba sa pagsalig sa publiko, nagapaluya sa ekonomiya, ug nagabutang sa peligro sa kahimtang sa katawhan labi na sa panahon sa hagit sa enerhiya.
Gipunting usab niini nga walay pasayloon ang gobyerno batok sa mga tinuyoang pagpakatap og sayop nga impormasyon alang sa personal o politikanhong interes.
Matud pa sa kalihim, seryoso nga paglapas ang bisan unsang pagsulay sa paglibog sa publiko bahin sa seguridad, suplay, ug presyo sa enerhiya.
Subay pa niini nga makigtambayayong ang PCO sa Department of Justice (DOJ) aron magpasaka og kaso batok sa mapamatud-ang nagpakatap og malimbongong impormasyon ug nagamanipula sa merkado.
Gipalig-on usab sa ahensya ang pagbantay sa social media ug uban pang paagi sa impormasyon aron mailhan ug mapugngan ang organisadong kampanya sa disinformation, uban sa Oplan Kontra Fake News.
Gisiguro sa gobyerno ang padayon nga paghatag og klaro, husto, ug kasamtangang impormasyon bahin sa sektor sa enerhiya, uban sa panawagan sa publiko nga mosalig lamang sa opisyal nga mga taho ug beripikadong datos.
Giawhag usab ni Secretary Gomez ang mga netizen nga mahimong responsable sa pagpaambit sa impormasyon ug siguruhong kini beripikado una ipakatap aron malikayan ang posibleng kadaot sa publiko.