Nasikop sa mga otoridad ang usa ka 50 anyos nga lalaki nga giilang Top Wanted Person tungod sa paglapas sa balaod batok sa gidili nga droga sa Balangay 8, Barangay Poblacion, Quezon, Bukidnon, niadtong Abril 4, 2026.
Giila ang dinakpan nga si Desiderio Nainque Madulin Jr., kinsa gisilbihan og Warrant of Arrest alang sa mga kasong illegal possession ug pagpamaligya og gidili nga droga (Section 5 ug Section 11) ubos sa Criminal Case Nos. 44008-24 ug 44009-24.
Sumala sa mando sa korte, adunay gitakda nga pyansa alang sa temporaryong kagawasan sa akusado, partikular na sa charge nga failure to appear. Sa pagkakaron, ang suspek anaa na sa kustodiya sa Quezon MPS alang sa saktong dokumentasyon sa dili pa kini itugyan ngadto sa korte.
Gipahibalo sa kapulisan nga magpadayon ang ilang agresibong kampanya batok sa mga wanted persons aron maseguro ang hustisya ug kalinaw sa komunidad.