Gipatinaw sa kampo sa sikat nga aktor nga si Coco Martin ang iyang ngalan human nanggawas ang mga malisyosong report ug anunsyo sa social media nga naglambigit kaniya sa mga online gambling o sugal sa internet.
Pinaagi sa usa ka opisyal nga pamahayag, gipatin-aw sa iyang pagdumala nga peke ug walay kamatuoran ang mga nanggawas nga video o hulagway nga nagpakita nga ang aktor nag-awhag sa publiko nga mosulod sa maong klase sa sugal.
Sumala pa, gigamit lamang ang iyang nawong ug tingog pinaagi sa AI technology o deepfake aron mailad ang mga tawo. Gipahinumdoman sa kampo sa aktor ang publiko nga magmabinantayon ug dili daling motuo sa mga makit-an sa social media, ilabi na kon wala kini gikan sa mga opisyal nga social media accounts ni Coco.
Dugang pa, gibutyag sa kampo ni Coco nga andam silang mohimo og lig-on nga legal nga lakang batok sa mga tawo o grupo nga nagpaluyo sa pagpakatap niining bakak nga impormasyon aron mapanalipdan ang integridad ug maayong dungog sa aktor.