Nakab-ot sa Ahmedabad Municipal Corporation ang Guinness World Record alang sa “Largest Flower Bouquet” human mabuhat ang pinakadakong flower bouquet sa kalibutan niadtong Enero 7, 2025 sa India.
Gitawag kini og “Unity Blossom”, usa ka higanteng bouquet nga may gitas-on nga 33 feet ug gilapdon nga 10.844 metros.
Gibuhat kini gamit ang kapin 11,700 ka buhing bulaklak nga chrysanthemum.
Gipakita ang maong obra isip kabahin sa Ahmedabad International Flower Show nga gihimo sa Sabarmati Riverfront, nga nagpasundayag sa dato nga kultura, mitolohiya, ug padayon nga kalamboan sa nasud.
Tungod sa katahum ug kadako, miabot sa kapin 158,000 ka turista ug lokal nga residente ang mitambong sulod sa unang tulo ka adlaw sa exhibit.
Tungod sa dakong kalampusan, gipalawig pa ang festival sa tema nga nagpunting sa relihiyon ug kultura, nga nagpakita sa panaghiusa bisan pa sa kalain-laing pagkatawo — usa ka tinuod nga ehemplo sa “unity in diversity.”