Gituohang panaglalis sa yuta ang motibo sa pagdunggab-patay sa usa ka 68-anyos nga lalaki sa Purok 3, Barangay Alae, Manolo Fortich niadtong Marso 25, 2026, sumala sa kapulisan.
Base sa report sa kapulissan, nakaplagan ang biktima nga nagbuy-od sa daplin sa dalan nga adunay daghang samad dinunggaban sa lawas. Usa ka 23-anyos nga magbabaligya og isda ang unang nakakita niini alas 7 sa gabii ug dayong mitaho sa barangay.
Sumala sa pamilya sa biktima, miadto kini sa ilang payag aron mokuha og nahibiling pagkaon alang sa baboy subay sa kasabutan sa suspek. Apan, gibutyag usab nga adunay daan nang panagbangi ang duha kabahin sa yuta, ug giingong gihulga na sa suspek ang biktima sa wala pa ang insidente.
Narekober sa SOCO team ang lain-laing ebidensya lakip ang bolo, duha ka .38 revolver ug uban pang personal nga gamit, samtang gideklarang patay ang biktima ug gidala sa punerarya alang sa autopsy.
Padayon ang hot pursuit operation sa Philippine National Police aron masikop ang suspek nga nailhang alyas “Mally,” samtang giimbestigahan pa ang maong insidente.