Gipasigarbo ni House Majority Leader Sandro Marcos ang pagpalabang sa Kamara sa 18 ka LEDAC priority measures sa wala pa ang Semana Santa.
Matud ni Marcos, ang track record sa Kamara sa LEDAC maoy pruweba nga ang hugot nga session calendar dili babag sa pag-asdang sa mga reporma sa ekonomiya, serbisyo publiko, ug proteksyon sa katilingban.
Gipasiugda usab ni Marcos, nga kugihan matud pa ang Kamara sa pagpasar sa mga priority bills sa administrasyon ug gipasigarbo ang mga kalamposan nga nakab-ot ubos sa pagpangulo ni Speaker Bojie Dy III.
Gidayeg usab niini ang paspas nga pagpalabang sa balaudnon nga naghatag gahum sa Presidente sa pagminus o pagsuspenso sa excise tax sa mga produktong petrolyo.
Sigon niini, nga mao kini ang gikinahanglan sa katawhan alang sa “immediate relief” batok sa kamahal sa presyo sa gasolina nga nakapausbaw usab sa gasto sa transportasyon ug mga batakang palaliton.
Gipasabot ni Marcos, nga ang mga balaod nga gipasar dili lamang numero kon ihap, apan gikaingong “proof of a working House” nga ang tumong alang sa kaayohan sa katawhan.
Ang Majority Leader midugang nga ang Semana Santa usa lamang ka “pause” ug dili pagpahinay sa mga tumong.
Sa 18 nga napasar, ang labing abante mao ang pag-postpone sa BARMM Elections nga nahuman na sa bicameral stage, samtang ang National Center for Geriatric usab kasamtangang gi-finalize.
Lakip usab sa mga prayoridad nga napasar mao ang EPIRA Amendments, Waste-to-Energy, Extension of Estate Tax Amnesty, ug ang balaudnon nga naghatag og gahom sa Presidente sa pagsuspenso sa excise tax sa petrolyo aron mahatagan og hinabang taliwala sa pagsaka sa presyo sa palaliton.
Dugang pa, anaa usab sa pipeline ang National Land Use Act ug ang pagpalig-on sa 4Ps.
Kasamtangang adunay kinatibuk-ang 9,632 ka mga measures ang nasang-at sa Kamara, nga giingon ni Marcos nga nagpakita sa usa ka “working House” nga andam motubag sa mga panginahanglanon sa administrasyon ug sa katawhan sa pagbalik sa sesyon.