Gisiguro ni Presidente Ferdinand Marcos Jr. nga lig-on ang baruganan sa gobyerno sa nasudnong depensa, uban sa pagpalig-on sa papel sa Philippine Army sa pinaagi sa Comprehensive Archipelagic Defense Concept.
Sumala sa Presidente, tumong niini ang pagpauswag sa abilidad sa hukbo sa external security operations samtang hinay-hinay nga gibalhin ang pokus gikan sa internal security operations.
Gipasabot usab niini, nga padayon nga palig-onon ang abilidad sa Armed Forces of the Philippines aron matubag ang bag-ong mga hulga, lakip na ang seguridad sa kadagatan ug cyberspace.
Gipasiugda usab ang kahinungdanon sa kooperasyon sa lain-laing ahensya sa gobyerno aron mas epektibo ang pagpatuman sa internal ug external defense.
Suportado usab sa Presidente ang padayon nga modernisasyon sa militar ug mga programa sa kalinaw sa komunidad, lakip ang mga inisyatibo sa Department of National Defense ug sa National Task Force to End Local Communist Armed Conflict.
Gidayeg niini, ang kabayanihan ug dedikasyon sa mga sundalo sa pagpanalipod sa kalinaw ug seguridad sa nasud.
Gipasiugda sa Presidente ang mga nakuhang pasidungog sa Hukbong Katihan ug ang ilang kolaborasyon sa Department of Science and Technology para sa mga bag-ong proyekto sa depensa.
Sa katapusan, giawhag sa Presidente ang mga sundalo nga magpadayon sa integridad, disiplina, ug propesyonalismo sa ilang serbisyo, aron makab-ot ang usa ka luwas ug mauswag nga “Bagong Pilipinas.”