Gisaway ni House Speaker Faustino Bojie Dy ang Department of Budget and Management (DBM) gumikan sa giingong hinay nga pagpagawas sa pundo alang sa mga proyekto sa gobyerno.
Atubangan sa mga kaubang mambabalaod niini, gihangyo sa Speaker ang maong ahensya nga tarungon ang trabaho ug paspasan ang mga lihok.
Matud pa ni Dy, bisan pa og paspas nga mapasar sa Kongreso ug mahimong balaod ang National Budget, mawad-an kini og bili kung malangay ang pag-abot ngadto sa katawhan.
Gipasiugda usab sa Speaker nga ang kalangay sa pundo kritikal kaayo alang sa pagpatuman sa mga programa ug proyekto, diin ang ordinaryong katawhan ang mag-antos sa epekto niini.
Taliwala niini nga isyu, nagpahimangno na usab ang National Unity Party (NUP) sa Kamara nga mamahimo kining mobiya sa mayorya kon dili mahatagan og dinaliang solusyon ang maong problema sa badyet.