Kapin 4,000 ka mga kapulisan ug kasundaluhan ang gipakatap sa Bukidnon, sa opisyal nga pagsugod sa NMRAA 2026 karung adlawa, aron masiguro ang kaluwasan sa liboan ka atleta, coaches ug spectators, samtang transportasyon nagpabiling dakong hagit sa maong kalihokan.
Sa pakighinabi sa Bombo Radyo Malaybalay kay PCpt. Sheila Joy P. Jangad, tigpamaba sa Bukidnon Police Provincial Office, nagsugod na ang full deployment human sa send-off ceremony sa Kaamulan Theater, diin gipakita ang joint forces lakip ang Philippine Army, BFP ug force multipliers. Mokabat sa 4,000 ka personnel ang gipahimutang sa nagkadaiyang venues ug eskwelahan sa probinsya nga nagbantay 24/7.
Gipatuman usab ang higpit nga security measures sama sa presensya sa uniformed personnel ug intelligence operatives nga naka-civilian aron magmonitor sa palibot ug malikayan ang posibleng krimen ilabina sa pagdagsa sa mga partisipante sa opening sa kalihokan.
Samtang, sumala kang Ricardo Dragon, ang Regional Sports Officer sa DepEd Region 10, nagpabiling dakong hagit ang transportasyon human kini hisgutan sa final briefing ug coordination meeting sa mga organizers. Tungod sa mandato sa gobyerno sa fuel conservation, giusab ang sistema sa transportasyon diin imbes libreng sakyanan alang sa tanan, gipunting ang paggamit sa “patient transportation” ug ubang alternatibo aron masiguro ang serbisyo sa mga delegado.
Nagpasalig ang mga otoridad nga andam ang seguridad ug koordinasyon aron mapadayon ang malinawon ug organisado nga pagdumala sa NMRAA 2026 bisan pa sa mga hagit sa transportasyon.