Nakasinati og kahuot sa mga gasoline station sa dakbayan sa Malaybalay kagahpong adlawa human gidagsa sa mga drayber nga nag-panic buying sa dili pa ang gikatakdang dakong umento sa presyo sa petrolyo.
Sumala sa taho, ang pagsaka sa presyo niabot ngadto sa 12.20 matag litro alang sa diesel, samtang ang gasolina misaka usab og 7.70 matag litro. Tungod niini, ang presyo sa unleaded ug special anaa na karon sa gibana-bana nga 78.15 hangtod 79.15 matag litro. Aduna pay ubang mga estasyon sa dakbayan nga gikaingong hapit na moabot sa 100 pesos ang matag litro.
Sa pakighinabi sa Bombo Radyo Malabalay kang Victor, usa ka pump attendant, gibutyag niini nga nahurot ang ilang stock sa diesel, turbo, ug XCS tungod sa kadaghan sa mga drayber nga naggukod sa pagpatubil sa makalabayng adlaw. Gidugang usab niya nga hugot nilang gidili ang pagbaligya og gasolina gamit ang mga gallon o container aron malikayan ang hoarding ug masiguro nga mahatagan ang tanang konsumidor.
Samtang, ang mga drayber sama ni Michael Tong-tong nipadayag sa ilang kabalaka ug kalisod. Matud pa niya, dako kaayo kini nga karga sa ilang panginabuhian sa kalsada, ilabi na kadtong wala nakahibalo sa maong pagsaka ug wala nakagukod sa pagpatubil samtang barato pa ang presyo.
Kini nga kalit nga umento sa presyo sa petrolyo sa tibuok nasod giingong epekto sa nagpadayong tensyon didto sa Middle East. Sa pagkakaron, namatikdan ang pagmingaw sa mga gasoline station human hingpit nga gipatuman ang bag-ong presyo kagahapong adlawa sa alas-sais sa buntag.