Nanawagan si Senator Erwin Tulfo nga ipasiguro nga makabenepisyo usab ang milyon-milyong motorista sa plano sa gobyerno nga suspensyon sa excise tax sa petrolyo, aron maminusan ang epekto sa pagsaka sa presyo sa lana.
Sa pagdungog sa Senate Committee on Ways and Means niadtong Marso 11, nagpasidaan si Tulfo batok sa posibilidad nga diesel lamang ang sakup sa tax relief.
Matud pa ni Tulfo, daghang motorista ang mahimong dili makabenepisyo kung diesel lang ang apil sa suspensyon sa excise tax.
Gipasabot sa senador nga daghang Pilipino ang gasolina ang gigamit sa ilang mga sakyanan ug motorsiklo.
Dugnag pa niini, gibanabana nga mga 8.5 milyon ka Pilipino ang naggamit og motorsiklo matag adlaw isip ilang nag-unang transportasyon paingon sa trabaho o panginabuhian.
Samtang, mitubag si Usec. Karlo Adriano sa Department of Finance nga ilang pagatun-an ang maong sugyot.
Matud pa ni Adriano, hisgotan kini sa Development Budget Coordination Committee ug sa Department of Energy aron makahimo og mas komprehensibong rekomendasyon alang sa Presidente.
Dugang pa niini, nagpasidaan usab si Tulfo batok sa posibilidad nga mahimong pamolitika ang pag-apod-apod sa fuel subsidy.
Sumala ni Tulfo, nga importante nga masiguro nga patas ug husto ang paghatag sa tabang sa mga motorista nga naapektuhan sa taas nga presyo sa petrolyo.