Nagtuo si Professor Dennis Coronacion nga dili moubos sa 50 porsyento sa mga miyembro sa House of Representatives of the Philippines ang mobotar pabor sa pagpadayon sa impeachment complaint batok kang Vice President Sara Duterte ngadto sa pormal nga paglitis.
Sumala sa political analyst, dako usab ang posibilidad nga molapas pa niini ang ihap sa mga mambabalaod nga mosuporta sa maong reklamo.
Ang taas nga suporta giingong misunod human sa pagbag-o sa hunahuna ug desisyon sa pipila ka mga miyembro sa 20th Congress kalabot sa impeachment complaint.
Gipasabot ni Coronacion nga sa milabay’ng mga bulan, nakita nga mikunhod ang suporta sa reklamo, apan human sa taas nga deliberasyon sa House panel, mibalik pag-usab ang suporta sa daghang magbabalaod.
Nagtuo usab kini nga makalusot sa ubos nga kapulungan ang impeachment complaint batok sa bise presidente.
Sa miaging mga pahayag, gibanabana sa pipila ka mga lider sa Kamara nga mahimong moabot sa 200 o kapin pa ka mga mambabalaod ang mosuporta sa complaint aron kini mapadayon ngadto sa hingpit nga trial.