Nagpagawas na og pamahayag ang International Criminal Court kalabot sa report nga adunay giingong arrest warrant batok kang Senator Ronald “Bato” Dela Rosa.
Giklaro sa ICC nga wala pa silay gipagawas nga public arrest warrant nga may kalabotan sa Pilipinas.
Gitambagan usab sa ICC ang publiko nga maminaw lamang sa mga opisyal nga pamahayag ug likayan ang pagpakaylap sa dili beripikadong impormasyon gikan sa online.
Una nang giingon ni Interior Secretary Jonvic Remulla nga nag-andam sila og kapin 10,000 ka task force kung mogawas ang warrant of arrest gikan sa ICC batok sa senador.
Apan giangkon usab ni Remulla nga hangtod karon wala pa siya makadawat og bisan unsang kopya sa maong arrest warrant gikan sa ICC.
Sa pikas bahin, magpagawas ugmang adlawa ang Criminal Investigation and Detection Group (CIDG) og subpoena batok kang Senador Ronald “Bato” Dela Rosa aron ipatawag kini alang sa usa ka imbestigasyon, kini sumala ni Interior and Local Government Secretary Jonvic Remulla human gikumpirma nga anaa lamang sa Pilipinas ang senador.
Kahinumduman nga si Dela Rosa maoy nagsilbi isip hepe sa Philippine National Police sa panahon sa administrasyon ni Rodrigo Duterte, nga karon nalambigit sa kaso sa madugong war on drugs nga giimbestigahan sa ICC.