208 ka mga indibidwal nga adunay warrant of arrest ang nadakpan sa Police Regional Office 10 (PRO-10) sa tibuok rehiyon sa Northern Mindanao gikan niadtong Marso 1 hangtod 20, 2026.
Sa gipahigayon nga press briefing ni Police Brigadier General Christopher N. Abrahano, Regional Director sa PRO-10, gipahayag niini nga sa maong gidaghanon, 41 niini ang giila nga “Most Wanted Persons” (MWP) samtang ang laing 167 mga wanted nga personahe sa nagkadaiyang dapit sa rehiyon. Ang mga dinakpan natingkagol na karon sa prisohan human sa serye sa mga operasyon sulod sa maong petsa.
Dungan niini, gipagawas usab sa PRO-10 ang datus sa ilang kampanya batok sa ilegal nga droga diin nasakmit ang kapin 4 ka kilo (4,014.753 gramos) sa gituohang shabu nga adunay estimated drug price nga kapin ₱27-milyones. Base sa rekord, miabot sa 192 ka operasyon ang gilusad nga miresulta sa pagkasikop sa 219 ka mga suspisado nga gipasakahan na og kaso sa korte.
Sa laing bahin, nakumpiska usab ang 64 ka loose firearms pinaagi sa 62 ka operasyon diin 20 ka indibidwal ang nadakpan. Sa operasyon batok sa illegal gambling, 49 ka personahe ang nasikop sa 36 ka buy-bust diin nakuha ang kapin ₱13,000 nga cash ug mga kagamitan sa sugal.
Matud ni Gen. Abrahano, kini nga mga operasyon kabahin sa gimbuhaton sa kapulisan aron mamentinar ang kahusay ug kalinaw sa tibuok Amihanang Mindanao.