Giprendang yuta ang nahimong mitsa sa duguong insidente human gidunggab gamit ang lagaraw ang usa ka 52-anyos nga lalaki sa iyang mismong kauban sa inom didto sa Purok 7, Barangay Minongan, Quezon, Bukidnon.
Subay sa report sa Quezon Municipal Police Station, nahitabo ang krimen pasado alas-4:00 sa hapon niadtong Hunyo 5, dihang nagka-init ang panaglalis sa biktima ug sa suspek kalabot sa bayad sa giprendang yuta samtang nagtagay sulod sa balay sa suspetsado. Sa dihang mopauli na unta ang biktima, giapas kini sa suspek ug kalit nga gihasgasan og lagaraw diin naigo ang wala nga bahin sa iyang hawak.
Paspas nga misibat padulong sa amihanang bahin ang suspek human sa pag-atake ug padayon pa karon nga gipangita sa mga otoridad. Samtang, ang biktima daling gidala sa iyang anak ngadto sa Infirmary Health Center Hospital diin kini nagpabilin alang sa obserbasyon apan gideklara nang anaa sa luwas ug stable nga kahimtang.