Gibana-banang mokabat sa ₱2 milyon nga danyos sa mga pananom ug greenhouse structures ang duha ka hektaryang flower farm sa Green Valley (Westland Flower Farm) sa Barangay Dalwangan, Malaybalay City human kini subling nabahaan niadtong milabayng adlaw ug kaniadtong Setyembre 22. Gitudlo sa tag-iya nga si JunRey Ruiz Perales nga ang kagamay sa box culvert nga gipahimutang sa Department of Public Works and Highways (DPWH) alang sa ilang Farm-to-Market Road project ang gitudlong hinungdan sa pag-awas sa tubig-baha.
Matud niya, ikaduhang higayon na kini nga nabahaan ang ilang mga pananom nga igbabaligya unta sa Kalag-kalag, diin ang una niadtong Hulyo mitala usab og kapin ₱5 milyon nga kadaut.
Samtang, gipatin-aw ni Malaybalay City Councilor Jayson Chad Ayala nga dili direktang makapanghilabot ang lokal na goberno sa proyekto tungod kay usa kini ka nationally-funded project sa DPWH ug adunay ginasunod nga program of works.
Apan gipasalig ni Ayala nga nakapadala na sila og resolusyon sa DPWH, ug addressing the immediate need, window-ready ang LGU nga moagak sa apektadong mag-uuma pinaagi sa heavy equipment alang sa paghawan sa debris ug pagproseso sa calamity assistance gikan sa CDRRMO.