Mikabat na sa 26 ang mga kasong may kalabotan sa flood control projects ang gisang-at sa Office of the Ombudsman sa Sandiganbayan batok sa pipila ka senador ug kongresista.
Gikumpirma kini ni Sandiganbayan Presiding Justice Atty. Geraldine Faith Econg atol sa Senate hearing sa proposed Fiscal Year 2027 budget sa Judiciary.
Sumala kaniya, ang unang kaso nga gisang-at sa Ombudsman may kalabotan sa flood control projects niadtong Nobyembre 18, 2025, ug ang unang mga kaso anaa na karon sa defense stage.
Gipasabot ni Econg nga ang pagkaabot sa defense stage wala pay usa ka tuig sukad sa unang pagsang-at sa kaso, nga nagpakita sa paspas nga pag-uswag sa proceedings.
Sa 26 ka kaso, usa ang gi-archive human dili matunton ang akusado.
Samtang ang ubang mga kaso nga adunay mga co-accused anaa na usab sa defense stage.
Matud ni Econg, ang 26 ka kaso gisang-at sa Office of the Ombudsman batok sa mga senador ug mga miyembro sa House of Representatives.
Gilauman usab nga mahimong masulbad sa Sandiganbayan ang pipila sa mga kaso sulod sa usa ka tuig, kung masunod ang gitakdang proseso ubos sa Speedy Trial Act.
Matud ni Econg, ang disposisyon sa kaso sulod sa usa ka tuig mahimong moresulta sa conviction o acquittal, depende sa ebidensiya ug desisyon sa korte.
Padayon ang pagproseso sa mga kaso samtang nagpadayon ang Sandiganbayan sa paghusay niini ubos sa gitakdang proseso sa korte.