18 ka minero, patay sa pagpamomba sa minahan sa India

Miabot sa 18 ka minero ang nakabsan sa kinabuhi samtang usa ang naangol human sa nahitabong pagpamoba sa usa ka ilegal nga minahan sa karbon sa northeastern state sa Meghalaya, India.

Gipahigayon na ang rescue operations sa maong dapit ug duna pay pipila ka mga tawo ang natanggong sa sulod.Matud pa ni Superintendent Vikash Kumar sa kapulisan sa maong estado, nahitabo ang insidente tungod sa “rat-hole mining.”

Kini usa ka delikado nga pamaagi sa pagmina diin mugamit og dinamita aron mabuslot ug makahimo og gagmay nga agianan pasulod sa tunnel.

Samtang, nimando na si India Prime Minister Narendra Modi sa paghatag og 200,000 rupees nga hinabang pinansyal para sa mga pamilya sa nangamatay ug 50,000 rupees para sa mga nangaangol.