Patay ang usa ka indibidwal sa Bicol Region tungod sa Super Typhoon Uwan (Fung-wong), sumala sa Office of the Civil Defense (OCD) kagahapong Dominggo.
Giila ang biktima nga taga-Viga, Catanduanes, ug namatay matud pa tungod sa pagkalumos nga dala sa dakong pagbaha.
Apan, gipasabot sa OCD nga ang maong report ilalom pa sa beripikasyon.
Sa kinatibuk-an, 1,179,086 ka tawo o 344,413 ka pamilya na ang gipailalom sa preemptive evacuation gikan sa mga rehiyon sa Cordillera, Ilocos, Cagayan Valley, Central Luzon, Calabarzon, Metro Manila, Bicol, Western Visayas, Central Visayas, ug Eastern Visayas.
Pinakadaghan sa mga evacuees gikan sa Bicol Region nga miabot og 671,254 ka tawo o 196,462 ka pamilya, samtang sa Eastern Visayas adunay 259,145 ka tawo o 71,692 ka pamilya nga mikasilong.
Sa pagkakaron, unom ka lugar pa gihapon ang anaa sa ilawom sa Tropical Cyclone Wind Signal No. 5.