Human sa kapin tulo ka bulan nga pagbaklay, malampusong natapos sa Washington, D.C. ang “Walk for Peace” nga gipasiugdahan sa mga Buddhist monks gikan sa Texas. Sulod sa 108 ka adlaw, ang grupo nagbaktas og kapin sa 2,300 ka milya latas sa nagkadaiyang estado sa Amerika aron ipakaylap ang mensahe sa kalinaw ug panaghiusa.
Wala mahimong sayon ang maong panaw tungod sa grabeng hagit sa panahon, sama sa ulan ug niyebe. Mas misamot ang pagsulay sa grupo diha sa usa ka aksidente sa dalan nga miresulta sa grabeng pagkaangol sa usa sa ilang kauban nga monghe.
Bisan pa man niini, wala matarog ang ilang baruganan ug malampuson silang niabot sa ilang destinasyon. Pag-abot sa kaulohan, mainiton silang gisugat sa mga supporters sa Lincoln Memorial, diin ilang gipahinumdom sa tanan nga ang tinuod nga kalinaw magsugod sa sulod sa kasingkasing sa matag tawo.