Gibutyag ni Kabataan Partylist Representative Rene Co nga walay rason aron ihunong o ilangay ang impeachment trial batok kang Vice President Sara Duterte bisan pa sa nagkadaiyang isyu sulod sa Senado ug sa bag-ohay lang nga tensyon human sa insidente sa pagpamusil niadtong Mayo 13.
Sumala ni Co, ang proseso sa impeachment kinahanglan magpadayon ug ang Senado, nga nakadawat na sa Articles of Impeachment, gilauman nga mag-convene isip impeachment court sa Mayo 18.
Dugang usab niini nga lig-on ang basehan sa kaso batok sa Bise Presidente, lakip ang isyu sa confidential funds ug giingong dili mapasabot nga bahandi nga mukabat sa ₱6.7 bilyon.
Gilakip usab sa mga alegasyon ang mga transaksyon sa bangko nga giingong gitan-aw sa Anti-Money Laundering Council isip kabahin sa ebidensya nga ipresentar sa husay.