MARAMAG, BUKIDNON — Patay ang usa ka 50-anyos nga lalaki human gidunggab sa dughan ug tiyan samtang nagtan-aw og sugal atol sa usa ka vigil sa Purok 1 West, Barangay Panalsalan, Maramag, Bukidnon niadtong Domingo sa buntag, Agosto 23.
Subay sa imbestigasyon sa Maramag Municipal Police Station (MPS), nibalik ang biktima sa dapit sa vigil aron kuhaon ang iyang motorsiklo ug mihapit kadiyot sa pagtan-aw sa mga nagduwa og baraha. Sa walay langan, kalit kining giduol sa usa ka 54-anyos nga suspek ug gidunggab makaduha ka higayon sa dili pa kini dali nga misibat.
Nasayran nga nagka-lalis na ang duha sa nag-unang gabii nga maoy gitan-awng hinungdan sa pagpanglingla. Gidala pa sa Maramag Rescue Team ang biktima sa Bukidnon Provincial Hospital (BPH)-Maramag apan gideklarar kini nga Dead on Arrival (DOA). Kasamtangang nagpahigayon og hot pursuit operation ang kapolisan sa mando ni Bukidnon Police Provincial Office Director PCOL Oliver Navales alang sa pagdakop sa suspek.