Patay ang wala pa mailhing lalaki atol sa pagsaulog sa pasko sa Barangay Dalwangan ning syudad.
Sa eksklusibong sa pakighinabi sa Bombo Radyo Malaybalay kang PCapt. Ernie Cabrera, Investigator sa Malaybalay City Police Station, nadawat sa buhatan ang tawag sa usa ka concerned citizen nga nagreport nga aduna’y lalaki anaa sa tunga sa dalan sa Purok 1, Barangay Dalwangan, alas 11:55 sa gabii sa adlaw sa Pasko, Disyembre 25, 2025.
Gidala gilayon ang biktima sa sa balay tambalanan apan gideklarang Dead on Arrival. Sa inisyal nga imbestigasyon, usa ka 40-anyos nga lalaki nga nagmaneho sa motorsiklo padulong sa Cagayan de Oro City ang nakakita sa biktima nga anaa sa dalan ug nagkadugo ang sa ulo.
Nasayran nga nabiktima kini sa hit and run. Kasamtangan padayon ang imbestigasyon sa Malaybalay City Police Station aron matino ang sakyanan nga nalambigit sa maong aksidente.
Gipanawagan usab sa kapulisan ang publiko kung adunay nawad-an og kabanay sa pamilya nga moadto sa istasyon alang sa pag-ila sa biktima.