Giangkon sa opisyal sa Office of the Vice President (OVP) nga adunay direktang kaalam, pag-aprobar, ug supervision si Vice President Sara Duterte sa tanang paghangyo, paggastos, ug pag-liquidate sa confidential funds sa iyang opisina.
Sa ika-18 nga adlaw sa impeachment trial sa Bise Presidente, gipatin-aw ni OVP Assistant Secretary Lemuel Ortonio nga si VP Duterte mismo ang naghangyo sa ₱250 million confidential fund sa DBM, nagdeterminar sa kantidad, ug nagpirma sa tanang disbursement vouchers ug liquidation reports.
Atol sa cross-examination ni prosecution counsel Atty. Mae Divinagracia ug Presiding Officer Sen. Francis “Chiz” Escudero, nitug-an si Ortonio nga adunay upat ka magkalahing rason nga gihatag ang OVP sa paggamit sa maong pondo—sama sa Good Governance Program, socio-economic delivery program, ug surveillance alang sa seguridad ug proyekto.
Tungod sa paiba-iba nga depensa, giingon sa prosekusyon nga daw usa ka “scam” o pagpanlingla ang maong paggahin og pondo, apan gi-sustain ni Sen. Escudero ang pag-protesta sa defense nga i-strike out ang maong mga pulong. Bisan pa man niini, gipahinumdoman ni Senator-Judge Alan Peter Cayetano ang duha ka bahin nga magmatngon sa paggamit og bug-at nga mga pulong sulod sa impeachment court.