VALENCIA CITY — Gipakusog sa lokal nga panggamhanan sa Valencia City ang pagpatuman sa mga dagkong proyekto sa imprastraktura, serbisyong panglawas, ug seguridad isip pagpangandam sa ilang target nga mahimong Highly Urbanized City (HUC).
Sa pakighinabi sa Bombo Radyo Malaybalay, gipadayag ni City Administrator Atty. Heinz G. Villanueva nga sugod na ang bidding alang sa ₱250-milyong pagpaayo sa Valencia Good Samaritan Hospital, diin itanyag ang libreng serbisyo medikal alang sa mga miyembro sa PhilHealth. Dugang pa niini, gipangandaman usab ang 8-kilometrong farm-to-market road ubos sa PRDP, ₱20-milyong rehabilitasyon sa drainage system, ug duha ka ₱100-milyong flood control projects.
Aron mapaspasan ang disaster response ug declogging, gigahinan usab sa syudad ang ₱150 milyon alang sa dugang nga heavy equipment.
Sa bahin sa seguridad ug kaayohan sa komunidad, nagmugna na ang syudad og Police Auxiliary Force nga adunay hangtod 60 ka opisyal, samtang nakigsabot usab sila sa militar alang sa dugang nga CAFGU personnel aron mapalig-on ang kalinaw sa buhing syudad.