MALAYBALAY CITY — Nadakpan sa mga miyembro sa CBO ug BPSO ang usa ka suspek sa pagpangawat og kanding sa Purok 6, Barangay Patpat, Malaybalay City, samtang nakadagan ang drayber sa motorsiklo nga iyang kauban.
Sa pakighinabi sa Bombo Radyo Malaybalay, gipadayag ni Barangay Kapitan Reynante Okit nga gisakpan sa aksyon ang suspek samtang nagkarga sa kanding nga gipanag-iyahan ni Geraldine Tali. Matod sa kapitan, dugay nang ginabantayan ang maong motorsiklo tungod sa pagkalambigit niini sa serye sa pagpangawat og kahayopan sa maong dapit.
Nakasutoy ug nakadagan ang drayber dihang giatubang sa mga barangay personnel, apan nasikop ang backrider nga gitunol na sa kapulisan ug CIDG alang sa saktong disposisyon ug pagpasaka og kaso.
Nanawagan usab si Kapitan Okit sa uban pang mga biktima sa pagpangawat nga mopasaka og opisyal nga kaso aron matuldokan na ang nagbalik-balik nga krimen ug mapalig-on ang seguridad sa komunidad.