Gibutyag ni Batangas Representative Gerville Luistro nga igo na ang pagka-convict sa bisan usa ka artikulo sa impeachment aron matangtang sa pwesto ug madiskwalipikar sa paghawid og bisan unsang posisyon sa gobyerno si Bise Presidente Sara Duterte.
Sumala ni Luistro, ang Senado isip impeachment court magboto matag usa ka artikulo human maipresentar ang mga ebidensya sa upat ka reklamo batok sa bise presidente, nga naglakip sa isyu sa confidential funds, giingong pagpanuhol, dili mapasabot nga mga kabtangan, ug giingong mga hulga.
Dugang pa niini nga kung makakuha og 16 ka boto ang usa ka artikulo, kini na ang igo aron mahatagan og silot ang usa ka impeachable official, lakip ang perpetual disqualification sa paglingkod sa bisan unsang public office.
Gipatin-aw pa ni Luistro nga bisan pa kon mo-resign ang opisyal samtang nagpadayon ang impeachment trial, kinahanglan gihapon kini ipadayon kay ang kaso may kalabotan usab sa posibleng tibuok kinabuhi nga diskwalipikasyon sa serbisyo publiko.