Mukabat sa kapin ₱2 milyon nga livelihood assistance ang nadawat sa unom ka Sustainable Livelihood Program Associations (SLPAs) sa Impasugong, Bukidnon atol sa ceremonial turnover sa mga tseke ubos sa Department of Social Welfare and Development (DSWD) Sustainable Livelihood Program (SLP).
Ang maong pondo gamiton isip panukad ug dugang kapital aron mapalambo ang panginabuhian sa mga asosasyon ug makahatag og mas daghang oportunidad sa ilang mga miyembro.
Lakip sa mga nakabenepisyo ang CUWA ZU SLPA, KADULUHAMN ZH SLPA, PUSYA IMFESCA ZH SLPA, ug Impasugong Solo Parents ZH SLPA nga matag usa nakadawat og ₱400,000. Samtang ang DMDC ZH SLPA nakadawat og ₱510,000, ug ang Kabuhayan Kibenton 4Ps ZH SLPA nakadawat og ₱300,000.
Gipasalamatan sa Local Government Unit sa Impasugong ang DSWD ug ang Municipal Social Welfare and Development Office sa padayon nilang suporta sa mga programang makapalig-on sa panginabuhian sa mga komunidad pinaagi sa pagtabang sa mga lokal nga asosasyon.