Nagpadala og dinalian nga hinabang ang United Arab Emirates (UAE), pinaagi sa UAE Aid Agency, alang sa mga pamilyang naapektuhan sa magnitude 7.8 nga linog nga miigo sa habagatang baybayon sa Pilipinas.
Matud ni Dr. Tareq Ahmed Al Ameri, chairman sa UAE Aid Agency, ang maong dinalian nga lakang kabahin sa internasyonal nga responsibilidad sa ilang nasod sa pagtabang sa mga komunidad nga natingban sa natural nga mga katalagman ug krisis.
Tumong niini nga maibanan ang kalisod sa mga biktima ug mapadali ang ilang pagbangon pinaagi sa koordinasyon sa mga internasyonal nga organisasyon ug lokal nga otoridad.
Gipasabot usab ni Al Ameri nga ang gihatag nga hinabang gibase sa usa ka komprehensibong pagtimbang-timbang sa ahensya ug sa gobyerno sa Pilipinas aron maseguro nga matubag ang dinalian ug kinauyokang panginahanglan sa mga biktima.
Duyog niini, mipaabot usab ang UAE sa ilang kinasingkasing nga pahasubo ug simpatiya sa gobyerno sa Pilipinas ug sa mga pamilya sa nangamatay, uban ang pag-ampo alang sa daling pagkaayo sa tanang mga nasamdan.