Gipaningkamotan ni Atty. Israelito Torreon nga ipakita ang legal nga basehan sa ilang pagkontra sa pagpatuman sa arrest warrant sa International Criminal Court (ICC) batok kang Senador Ronald “Bato” Dela Rosa, human giingong giila mismo sa gobyerno ang bisa niini sa Pilipinas.
Matod ni Torreon, bisan gibasura sa Korte Suprema ang ilang hangyo alang sa temporary restraining order o TRO tungod kay wala pay direktang hulga sa katungod ni Dela Rosa, gipahibalo sa DILG pagkasunod adlaw nga ipatuman ang warrant ug gimandoan ang Philippine National Police o PNP nga motuman niini. Usa ka semana human niini, gitawag usab ni Presidente Ferdinand Marcos Jr. si Dela Rosa nga pugante sa hustisya.
Gikuwestiyon usab ni Torreon ang mga isyung naglibot kang Dela Rosa ug sa impeachment proceedings batok kang Vice President Sara Duterte, nga iyang giisip nga politikal nga drama aron mabalhin ang atensyon sa publiko gikan sa mas dagkong problema sa nasud, sama sa flood control scandal, ilegal nga droga ug grabeng kalisod sa katawhan.