Tingkagol sa selda sa kapulisan ang usa ka 54-anyos nga lalaki kinsa giila nga Top 7 Most Wanted Person sa lebel sa probinsya human kini malampusong nadakpan sa lungsod sa Manolo Fortich niadtong Abril 21.
Giila ang dinakpan nga si Randy Tortusa Dancil, residente sa Zone 2, Barangay Dicklum sa maong lungsod. Ang pagdakop sa nahisgutan resulta sa joint operation sa Manolo Fortich Municipal Police Station ug uban pang yunit sa kapulisan sa Bukidnon.
Sa pakighinabi sa Bombo Radyo Malaybalay, nasayran nga giatubang sa suspek ang kasong Acts of Lasciviousness ubos sa balaod sa child abuse. Gikasugtan sa korte ang piyansa nga mobalor sa ₱100,000 alang sa iyang temporaryong kagawasan, base sa warrant of arrest nga gipagawas sa milabayng semana.
Sa pagkakaron, anaa na sa kustodiya sa Manolo Fortich MPS ang maong dinakpan alang sa gikinahanglang dokumentasyon ug saktong disposisyon sa balaod.