Gipalig-on karon sa Bukidnon Police Provincial Office (BPPO) ang gihimong manhunt operation batok sa suspetsado sa brutal nga paglugos ug pagpatay sa usa ka nuwebe anyos nga batang babaye sa dakbayan sa Malaybalay.
Sa pakighinabi sa Bombo Radyo Malaybalay, gipahayag ni PCpt. Sheila Joy Jangad, ang tigpamaba sa BPPO, nga naila na ang suspetsado kinsa giingong silingan ra usab sa biktima. Gibutyag ni Jangad nga andam na ang kapulisan sa pagpasaka og kaso karong adlawa, Abril 22, dungan sa pagpagawas sa resulta sa autopsy. Ubos sa direktiba ni Police Colonel Oliver Navales, gipakatap na ang intelligence unit alang sa gihimong hot pursuit operation human makakuha og mga lig-on nga testimonya gikan sa mga saksi.
Nasuta usab sa imbestigasyon nga ang maong suspek duna nay mga daang rekord sa balaod, lakip ang kasong carnapping niadtong 2019 ug kasong murder kaniadto sa lungsod sa Lantapan. Samtang nagpadayon ang pagpangita, nagpabilin ang P50,000 nga ganti alang sa bisan kinsa nga makahatag og impormasyon sa nahimutangan sa maong kriminal.
Nanawagan usab ang kapulisan sa mga ginikanan nga doblehon ang pagbantay sa ilang mga anak aron malikayan ang susamang kaguol, dungan sa pasalig ngadto sa pamilya sa biktima nga dili sila moundang hangtod nga mapanubag ang suspetsado sa linuog niining buhat.