Nangayo og pasaylo ang lokal nga kagamhanan sa probinsya sa Bukidnon ug ang Provincial Agriculture’s Office (PAgrO) ngadto sa pito ka tribu human mikondena ang National Commission on Indigenous Peoples (NCIP) tungod sa giingong pagpanamastamas sa kultura atol sa Lechon Festival sa Kaamulan 2026.
Sumala ni Jun Cruz sa Events Committee, daling nagpagawas og memorandum si Governor Rogelio Quiño aron paimbestigahan ang insidente human nasuta nga ang maong presentasyon wala sa orihinal nga plano ug adunay mga “lapses” sa implementasyon. Giklaro usab ni Dr. Emma Ravelo sa PAgrO nga tuyo lamang unta nila ang pag-promote sa hog industry sa probinsya, apan miangkon sila nga nakalapas sa kultura sa mga lumad.
Dungan sa maong pagpangayo og pasaylo, nanawagan ang mga kawani sa PAgrO og konsiderasyon gikan sa mga tribal leaders mahitungod sa gipangayong pito ka kabaw, walo ka manok, ug usa ka baboy alang sa ritwal nga “hapuhap sa ginhawa.” Sumala ni Dr. Ravelo, bug-at ra kaayo ang maong mga rekisitos alang sa mga yano nga empleyado, hinungdan nga nangayo sila og tabang sa Provincial IPMR aron mahimong taytayan sa maayong kasabutan.
Naglaum ang kagamhanang probinsyal nga pinaagi sa dayalogo ug tradisyonal nga pamaagi sa pagpasaylo, mahatagan na og saktong resolusyon ang maong isyu ug mabalik ang harmonya tali sa gobyerno ug sa pito ka tribu sa Bukidnon.