Titanic pocket watch nasubasta og kapin ₱117-M

Nasubasta sa kantidad nga dul-an US$2 milyon o kapin ₱117 milyon ang 18-carat Tiffany & Co. gold pocket watch nga gihatag kang Arthur Rostron, kapitan sa RMS Carpathia nga nakaluwas sa kapin 700 ka survivors sa pagkaunlod sa Titanic niadtong 1912.

Giregalo ang relo ni Madeleine Astor ug duha pa ka mga survivor isip pagpasalamat sa kaisog ni Rostron sa pagresponde sa distress call ug pagtabok sa dapit nga puno sa mga iceberg aron sa pagluwas sa mga pasahero.

Sumala sa Henry Aldridge and Son auction house, kini na ang labing mahal nga Titanic memorabilia nga nabaligya sa subasta, nga nagpakita sa padayon nga dakong interes sa publiko sa kasaysayan sa Titanic.