Nadawat na sa Senate Impeachment Court ang mga tax record ni Vice President Sara Duterte, sa iyang bana nga si Atty. Mans Carpio, ug sa ilang mga nalambigit nga korporasyon gikan sa Bureau of Internal Revenue (BIR).
Ang pagpagawas sa maong mga dokumento nahitabo human gihatagan og pormal nga pagtugot ni Presidente Ferdinand “Bongbong” Marcos Jr. ang BIR kasunod sa gipagawas nga subpoena sa korte. Matud ni Palace Press Officer Undersecretary Claire Castro, gihimo lamang sa Pangulo ang nakatakda sa balaod ug ang hustong legal nga proseso.
Gawas sa BIR records, gipangayo usab sa korte ang mga bank record ug dokumento gikan sa Anti-Money Laundering Council (AMLC). Gipahayag ni House Prosecutor Rep. Terry Ridon nga importante kaayo kini nga dugang ebidensya, samtang gipatin-aw ni Prosecution Spokesperson Rep. Zia Alonto Adiong nga makatabang kini aron masuta ang mga pondo ug transaksyon nga posibleng wala maapil sa Statement of Assets, Liabilities, and Net Worth (SALN) sa Bise Presidente.
Samtang, gipadayag sa Malacañang nga igo na ang kasamtangang mga balaod aron masiguro ang transparency sa pondo sa lungsod. Apan gipunting sa Palasyo ang panginahanglan sa estrikto nga pagpatuman niini, lakip na ang pag-report sa mga bangko ngadto sa AMLC bahin sa mga unusual o dagkong cash withdrawal.