Giisip sa Malacañang nga “walay basehan ug walay saysay” ang mga pamahayag ni Bise Presidente Sara Duterte nga gisuportahan kuno ni Presidente Ferdinand Marcos Jr. ang International Criminal Court (ICC) batok sa iyang amahan nga si kanhi Presidente Rodrigo Duterte.
Matud ni Palace Press Officer Undersecretary Claire Castro, ang mga gipahayag sa Bise Presidente posibleng bunga ra sa iyang pagkadismaya samtang giatubang sa iyang amahan ang kaso sa langyaw nga korte.
Gipasabot ni Castro nga ang kaso batok sa kanhing presidente nagsugod pa niadtong tuig 2017—panahon diin pribadong lungsuranon pa si Marcos. Pagtuman lamang sa kasamtangang balaod ang gihimo sa Presidente ug dili kini angay basolgon sa giatubang nga ligal nga usapin sa pamilyang Duterte.
Gidugang usab sa Palasyo nga walay giusab sa baruganan sa administrasyon bahin sa pag-apil og balik sa Pilipinas sa ICC tungod kay wala pay gihimong opisyal nga mga diskusyon bahin niini.