MALAYBALAY CITY, BUKIDNON — Nadakpan sa Bukidnon Police Provincial Office (BPPO) ang 19-anyos nga pangunang suspek sa pagpatay sa miyembro sa LGBTQIA+ nga nailhang “Alias Betty” atol sa operasyon batok sa curfew sa Sitio Sabang, West Poblacion, Kalilangan sayong kadlawon sa Agosto 6.
Sumala ni BPPO Spokesperson PCpt. Sheila Joy P. Jangad, misukol ug misulay pagdunggab sa pulis ang suspek gamit ang hunting knife samtang gipatuman ang curfew ordinance. Sa gihimong imbestigasyon, nadiskobrehan nga ang maong nadakpan mao usab ang gipangitang suspek sa pagpatay kang Betty niadtong Hulyo 27 sa Barangay Inhobol, Malaybalay City. Mag-atubang usab kini og separadong kaso sa pag-atake sa hawas sa balaod samtang giandam ang pormal nga kasong murder.
Gipadayag usab ni Malaybalay City Councilor Jayson Chad Ayala nga dako ang natampo sa iyang personal nga “Bring Me” reward system sa dali nga pagkasikop sa suspek. Gitin-aw sa konsehal nga usa ka informant ang nakahatag og importanteng impormasyon nga mitultol sa kapulisan, diin ang gipagawas nga ganti naggikan sa iyang kaugalingong bulsa ug dili sa pondo sa gobyerno.
Dungan niini, padayon nga nanawagan ang BPPO ug ang konsehal sa publiko nga magtinabangay ug maghatag og kasaligang impormasyon aron mapadali ang pagsulbad sa mga krimen ug mapadapat ang hustisya sa tanang biktima.