MALAYBALAY CITY — Gipangita na karon sa kapolisan pinaagi sa usa ka hot pursuit operation ang suspek sa pagpatay sa usa ka 24-anyos nga miyembro sa LGBTQ+ community nga si Delbert Benito o mas nailhang “Betty”, kinsa nakaplagang wala na’y kinabuhi sa kasagbutan sa Barangay 1, Malaybalay City.
Sa pakighinabi sa Bombo Radyo Malaybalay kang PCpt. Sheila Joy P. Jangad, tigpamaba sa Bukidnon Police Provincial Office, giila na sa usa ka saksi ang suspek nga kaila ra usab sa biktima. Subay sa imbestigasyon, nakita ang duha nga naglalis sa lugar sa wala pa ang insidente, diin gihulagway nga gibunalan sa suspek ang ulo sa biktima gamit ang usa ka gahi nga butang.
Giandam na sa kapolisan ang mga dokumento alang sa pagsaka og kasong murder batok sa suspek samtang padayon ang pagsuhid sa motibo ug sa ilang relasyon.
Samtang, taliwala sa kasakit sa kalit nga pagkawala sa iyang anak nga maoy nag-unang gapatabang sa ilang panimalay, gipahayag sa amahan nga si Ermin Benito nga dawaton na lamang niya ang nahitabo ug wala siya’y gihuptang pagdumot, apan padayon gihapon ang iyang panawagan nga mahatagan og dinalian nga hustisya ang gidangatan ni Betty.