Gibutyag ni Senadora Imee Marcos nga usa ka giingong confidential agent sa National Bureau of Investigation ang nadakpan human sa nahitabong insidente sa pagpamusil sulod sa Senado kagabii, Mayo 13, 2026.
Matod sa senadora, nadakpan ang maong indibidwal human matud pa kini mikuha sa usa ka tactical bag nga nabilin sa hagdanan sa ikaduhang andana sa Senado diin nadungog ang sunod-sunod nga buto sa pusil.
Apan giingon ni Senadora Imee nga mitug-anmatud pa ang maong indibidwal nga ang iyang superior mao si “Atty. Bomediano” sa NBI-Organized and Transnational Crime Division o NBI-OTCD.
Dugang pa sa giingong agent, ang operasyon matud pa adunay kalabotan sa giingong plano sa pag-aresto kang Sen. Ronald dela Rosa nga giatubang sa giingong arrest warrant gikan sa International Criminal Court.
Gibutyag sa Southern Police District nga giila ang suspek nga si Mel Oragon, 44-anyos ug usa ka driver sa National Bureau of Investigation.
Nanawagan usab si Senadora Imee kang Atty. Bomediano nga mopatin-aw sa nahitabong kagubot sa Senado nga miresulta sa lockdown ug pagpamusil sulod sa building.
Samtang, una nang gipanghimakak ni NBI Director Melvin Matibag nga adunay gipadalang personnel ang NBI ngadto sa Senado, supak sa gipahayag sa senadora.
Samtang sa pagkakaron, arestado na ang suspek sa nahitabong shooting incident sulod sa Senado kagabii.