MALAYBALAY CITY — Nanawagan ang buhatan sa Barangay Patpat ug ang Malaybalay City Police Station alang sa dinalian nga pagbalik sa kapin 90 ka mga baboy nga gipanguha sa pipila ka residente human natumba ang usa ka truck sa maong dapit.
Sa pakighinabi sa Bombo Radyo Malaybalay, gipadayag ni Barangay Kapitan Reynante Okit nga natumba ang truck sa Farm Fresh nga nagkarga og kapin 200 ka baboy alas-6:00 sa buntag human kini napakyas sa pagsaka sa subida ug na-atras sa kanal samtang naglikay sa usa ka nakaparadang wing van. Giklaro sa kapitan nga miulbo lamang ang pagpanguha sa mga baboy human nakaylap ang bakak nga hungihong nga ipanghatag na kuno ang maong mga hayop.
Sa kasamtangang monitoring sa barangay council, 38 pa lamang ka baboy ang naibalik sa kompanya, samtang gibanabana nga kapin 90 pa ang nagpabilin nga wala pa marekober.
Tungod niini, naglibot na ang mga opisyal sa barangay kauban ang kapulisan aron pahinumdoman ang tanang nakakuha nga ibalik dinalian ang mga baboy, samtang gipahait nga walay gihatag nga opisyal nga pagtugot ang Farm Fresh ug padayon ang ilang opisyal nga pagbawi sa maong mga propedad.