Nagpahimangno ang mga otoridad sa nagkadool nga peligro sa Amihanang Luzon samtang nagpaduol ang mata sa Super Typhoon Nando sa Babuyan Islands.
Base sa pinakabag-ong datos gikan sa Aparri Doppler Weather Radar, anaa matud pa sa 110 km sa sidlakan sa Calayan, Cagayan ang mata sa bagyo.
Aduna kini kakusgon nga hangin nga 215 km/h ug maximum nga pagharos nga moabot sa 265 km/h. Nagalihok ang bagyo pa-kasadpan sa tulin nga 20 km/h.
Ilawom sa Signal No. 5 ang Babuyan Islands, Signal No. 4 ang Habagatang bahin sa Batanes, Amihanang bahin sa mainland Cagayan, ug Amihanang bahin sa Ilocos Norte.
Samtang Signal No. 3 ang nahibiling bahin sa Batanes, tunga-tungang bahin sa mainland Cagayan, Amihan ug tunga-tungang bahin sa Apayao ug ang nahibiling bahin sa Ilocos Norte.
Gipailawon usab sa Signal No. 2 ang pipila ka bahin sa mainland Cagayan, Isabela, Apayao, Abra, Kalinga, Mountain Province, Ifugao, Amihanang bahin sa Benguet, Amihanang-sidlakang bahin sa Nueva Vizcaya, Ilocos Sur, ug La Union.
Nagpabilin sa Signal No. 1 ang mga lugar sama sa Quirino, nahibiling bahin sa Nueva Vizcaya, Benguet, La Union, Pangasinan, Aurora, Nueva Ecija, Bulacan, Tarlac, Pampanga, Zambales, Amihanang bahin sa Quezon, lakip na ang Polillo Islands.
Gipasidan-an ang tanang residente sa mga apektadong lugar nga mag-andam, magpabiling alerto, ug mosunod sa mga abiso sa lokal nga panggamhanan ug mga eksperto.